قصيدة أنا الفلول

قصيدة أنا الفلول
أنا الفُلول
أنا القديم و أنا الجديد
أنا المُحلَّل
و الحلول
رغم الذهول
أنا اللي باقي ف الوَطَن
حتّى الذُبول
و ما دام في روكسي فيه طُبول
و الكَنبَة مليانة ب سوداني
و لب سوبر .. لتر بيبس
لِبان .. و شيبس
و غِش دولا .. و كِدب دُول
حمشي مع أمك ف الحَرام
و أهم حاجة ف الاغتصاب
هو القُبول
..
أنا الفلول
ساعات بكون ماسِك مايك
و هات يا كِذب
ساعات بكون
ريَس ف حِزْب
و أكون مُناضِل ف الميدان
و أبوس بيادات العساكر ف الضَلام
و بقول كَلام
و اعمل كلام
و اركَب جِمال
و اركب خيول
..
أنا الفلول
أنا المعارض و الموالي
أنا المُزيّف و المثالي
اللا حقيقي
و ف طريقي
لأي كُرسي
لأ أبالي
ب دين .. ب عُرْف .. أو أصول
..
أنا الفلول
الفُلَّلي
بشرب عصير من دمّكم
و الباقي أبيعه ل فرغَلي
أقدر أكون أرييل شارون
و أقدر أكون ناجي العَلي
حَسَب الضجيج المَرْحَلي
صوتي بيعلى
عشان أطول
أنا الفلول

Sent from my BlackBerry® wireless handheld